Ертіс ГЭС каскадында көктемгі су тасқыны кезеңі басталды, ол шамамен мамыр айының басына дейін жалғасады. Бұқтырма ГЭС-і, Өскемен ГЭС-і және Шүлбі ГЭС-інің жұмысы қазіргі гидрологиялық жағдайды ескере отырып, Ертіс бассейндік су инспекциясымен (ЕБСИ) үйлестіріледі. Су тасқынының негізгі кезеңі — «тасқын өзегі» — қазірдің өзінде басталды.
Қалыпты жағдайда Өскемен ГЭС-інде электр энергиясын өндіру үшін орта есеппен секундына шамамен 550 м³ су жұмсалады. Қазіргі уақытта станция сағасындағы су шығыны ЕБСИ белгілеген көлемде — секундына 1250 м³, оның шамамен 500 м³ генерациядан тыс режимде өтуде: су төгетін бөгеттің төрт секциясының бірінде қалқан көтерілген.
Көктемгі су тасқыны — өзеннің табиғи тепе-теңдігін сақтаудың маңызды элементі. Реттелетін су жіберілімдері су экожүйелерін, уылдырық шашу орындарын сақтауға және Ертістің табиғи гидрологиялық режимін қолдауға қажет.
Бұл кезеңде ГЭС жұмысының режимдері су ресурстары, энергетика, су көлігі және ауыл шаруашылығының мүдделерін ескере отырып қалыптастырылады. Мысалы, Ертістегі су тасқыны Павлодар облысындағы өзен жайылмасын су басу үшін де пайдаланылады (бұл — көктемде балық уылдырық шашатын, аумағы 377 мың гектардан асатын бірегей экожүйе).
Станция су тасқыны кезеңіне алдын ала дайындалды. Күзгі-қысқы кезеңде негізгі жабдықтарға ағымдағы жөндеу жұмыстары жүргізілді, гидротехникалық құрылыстар тексерілді, бақылау және басқару жүйелері қаралды. Персонал аварияға қарсы жаттығулар аясында іс-қимылдарын пысықтады. Тәуелсіз сарапшы мен Ертіс бассейндік су инспекциясының өкілі қатысуымен станцияның су тасқыны кезеңіне дайындығы туралы актіге қол қойылды.
Су шығынының артуына қарамастан, Өскемен ГЭС-і штаттық режимде жұмыс істеп, су тасқыны кезеңінің сенімді әрі қауіпсіз өтуін қамтамасыз етуде.