2018 жылдан бері Өскемен ГЭС Шығыс Қазақстанның су айдындарына 1,4 миллионнан астам біржаздық сазан шабағын жіберді. Алдын ала есептеулерге сүйенсек, алғашқы жылдары жіберілген шабақтардан 70 тоннадан астам ересек балық өсіп шығуы мүмкін. Ал осы уақыт аралығында жіберілген барлық шабақтың есебінен балық қоры 140 тоннадан астам ұлғаюы ықтимал.
Қазан айында Шүлбі су қоймасының Қызылсу шығанағына тағы 64 мыңнан астам біржаздық сазан шабағы жіберілді.
Балықтандыру жұмыстарының нәтижесі бірден байқалмайды. Шабақтардың өсіп, ересек балыққа айналуына бірнеше жыл қажет. Мамандардың есептеуінше, суға жіберілген шабақтардың шамамен 5%-ы тірі қалып, ересек жасқа жетеді. Яғни әрбір 100 шабақтың бесеуі өсіп жетілуі мүмкін. Ересек сазанның орташа салмағы 2–3 келі екенін ескерсек, 2018 жылдан бері жүргізілген балықтандыру жұмыстарының нәтижесінде балық қоры 140–210 тоннаға артуы ықтимал.
Алайда нақты нәтиже су айдындарының табиғи жағдайына, қоректік қорына және балықтардың тіршілігіне әсер ететін басқа да факторларға байланысты. Өсіп жетілген сазандар табиғи жолмен көбейіп, балық санының артуына да ықпал етеді.
Өскемен ГЭС табиғатты қорғау жұмыстары аясында су айдындарын жыл сайын балықтандырып келеді. Бұл сазан санын көбейтуге, өңірдегі балық қорын сақтауға және су айдындарының табиғи тепе-теңдігін қолдауға бағытталған.
Кәсіпорын үшін бұл жұмыстың маңызы тек суға жіберілген шабақтардың санында емес. Ең бастысы — олардың өсіп жетіліп, алдағы жылдары Шығыс Қазақстанның балық қорын толықтыруы.